تجربتي مع أمتحان كفايات

تجربتي مع أمتحان كفايات للمعلمات

أنا منال خريجة لغة أنجليزية أمتحنت قياس المرحلة الأولى ونجحت والحمدلله ،،
مريت بلخبطة وحوسة قياس لأنه كان جديد ،،وأصلا كان لي سنتين أدربي راسي ناسية أوم التعليم .
المهم ،،هنا بكتب طريقتي كل شيء أعرفه عن قياس وتجربتي بالمذاكره على شكل أسئلة وإجابات علشان تختصرون
على أنفسكم وماتضيعون وقت .

*وش طبيعة الأسئلة؟
الأسئلة ١٢٠ سؤال راح تكون خيار واحد تظللين على دائرته من بين ٤خيارات

*أيش نوعية الأسئلة اللي بتجي بقياس ؟

١)مهارات لغوية ويشمل القواعد العربية،التعبير اللغوي ،وعلامات الترقيم ،الأملاء .
“سهله مرره لو بتذاكرون الحقيبة اللغوية والروابط اللي بحطها بعدين، على الله ثم على الحقيبه اللغوية بيكون سهل ”

٢)مهارات عددية ويشمل البيانات والاحصائات ،مسائل وعمليات حسابية، الهندسة
“أنا دبشه بالرياضيات وما أنلام لأن لي ٨سنين ماحسبت ولاذاكرت لأحد حتى جدول الضرب مانيب حافظته
عانيت أني بلقى أحد يعلمني بالرضيات ويالله لقيت شيء أذاكر منه :(
شلت همه أكثر من التخصص حتى بالأمتحان كنت أحسب بأصابعي وأشوف المشرفه تنقد علي بس ماعلي منها بس الحلو أن درجته يجمعونها مع التربوي واللغوي ثم يقسمونها يعني ماراح تتضررين كثير لو شديتي حيلك باللغوي والتربوي “

٣)مهارات تربوية ويشمل المناهج وطرق التدريس ،إدارة الصف،النشاط الطلابي، النمو المهني ،تقنيات التعليم
“سهل يعتمد على تصرفك بالفصل والخيارات أحيانا تكون واضحه وأحيان لا تلقين خيارين قريبين من بعض
عموما الحقيبه التربوية والراوبط اللي بحطها تكفي مايحتاج تحوسين كثير بهالجزئية ”

٤) عن التخصص :مثلا الانجليزي أذكر جابوا لنا الأسئله باللغة الانجليزية عن القواعد عن الصوتيات طرق تدريس اللغة الأنجليزية”طريقة الترجمة ،طريقة القرأة،طريقة الكلمات،الطريقة الموسعه ….” عن نظريات تدريس اللغة الأنجليزية وعن الكلمات وعن التعامل مع الطلاب بمهارات الماده
وصراحة ماتوقعت يسألون عن طرق التدريس ونظريات تعليم اللغة جابوا لي الجلطه بالقاعه
يعني التخصص يبي له فهم وذاكره أكثر لأن الخيارات بتكون قدامك وأنتي ومخك.
ولازم تجيبين فيه درجة فوق ٥٠من ١٠٠ وإلا سقطتي

*)مهارات الحاسب الآلي- عن برامج العرض والتحرير كـ الاكسل وورد بوربوينت ،أجزاء الحاسب
(مهارات الحاسب هم يحطونها على أساس أنها من تقنيات التعليم بس أنها أعتبرها نوع من أنواع المهارات ،أنصدمت لأنهم دمجوها مع الأسئلة وأناماجهزت شيء عن الحاسب بس كانت الأسئلة عن الحاسب قليله )

*مدة الأختبار كم وبيكفيني وقت ؟
مدة الاختبار ساعتين ويكون الدفتر مقسم أربع أقسام أزرق أخضر وأصفر ورمادي
كل قسم له نص ساعة وبعدها خلاص تقفلينه وماترجعين له ،،
يعني مجموع الأسئله راح يكون ١٢٠سؤال خلال ساعتين ،كل نص ساعه فيه٣٠سؤال كل سؤال عليه دقيقه
الوقت راح يكفي لأن بعشر أو عشرين ثانيه تحلين السؤال وتنقلين للسؤال اللي بعده الخيارات راح تساعدك
وقدامك راح يكون فيها عداد ٣٠دقيقه بالبروجكتر لكل قسم
يعني فيه أسئلة ماتأخذ نص دقيقة وأسئلة تأخذ الدقيقة كاملة

*)هل الأسئله مرتبه قسم مهاري قسم لغوي قسم عددي قسم تخصص؟
لا مو مرتب دامجينهن مع بعض بس الجزء الأخير يركز على التخصص كثير

*)درجة النجاح فيه وشلون تكون ؟
٥٠ وفوق بالتخصص
٥٠وفوق بالمهارات (اللغوي والعددي والتربوي) يجمعونهن سواء ودرجتهن تكون وحده
يعني لو جبتي بالتخصص٤٩ وبالمهاري ٧٠تسقطين
لازم كلهن فوق ٥٠

*وشلون نذاكر لقياس ؟
كانت طريقتي كل أسبوع جزء الاسبوع الاول عن التربوي
الاسبوع الثاني العددي ،الأسبوع الثالث اللغوي ،الأسبوع الرابع التخصص
وغالباً اعتمدت على الحقائب ونموذج الأسئله وكان كافي جدا بالنسبه لي
والاسبوع ما أقراء فيه إلا يومين أوثلاثة لأن الرجعة للقرأة والدراسة تجيب الغثى وثقيله جداً
“أمي كل ماشافت أني غاطسه بالأيباد تحسبني آذاكر وأنا من جنبها ألعب Fun Run “
التخصص ماقريت إلا كتاب القواعد express English وحملته إلكتروني وسويت أختبار إلكتروني عن الكلمات والقرامر وهيك ماكنت أدري وش أقرأ
اللي بتختصر مذاكرتها بأسبوع راح تنجن مايمديها ولأن النفس ترفض الحشو ،،

*)ليش أقرأ وهم بيجيبون أسئله مالها منهج خليها عشوائي تخيب أو تصيب؟
لكذا سبب
١-الله أمرنا العمل بالأسباب ولأنه ماراح يضيع أي تعب أوجهد
٢-الكلاب ساحبين منتس متين ريال وأن قدرتي تأخذين منهم شيء فهو القلم أبو ريالين بعد الأختبار
(باقي بذمتهم لي ١٩٨ريال يوم أخذت القلم معي ،،مفروض تنرجع يوم نجحت)المفروض تسوين شيء
كِرمال هالمتيئن ريال
٣-إحنا يالبنات نجسات اللي تذاكر ماتعلم خوياتها تخاف تسقط و يقولون هالدبشه بس تذاكر وماتفلح ذبحتها شفاحتها على الدنيا ،،عاد لاجيتي كل الدنيا مذاكره إلا أنتي على نيتك هماهن يقولون ماذاكرنا !!
٤-تتعودين على الأسئله والكلام لأنه لو جيتي بدون ماتقرين شيء بتفتحيين بوهتس حتى لو الأسئله سهله
سنين وسنينننن المخ ماقرأ ولاكتب ولا تعود على اللغة الأكاديميه وراح تلاحظين أنك تقرين السؤال أكثر من مره
و تحاولين تستوعبين هالهرج اللي بالورق

*)يقولون فيه مناطق يكون النجاح فيها أعلى من مناطق وهالشيء راجع للتصحيح ؟
مو صحيح أبدا لأن التصحيح آلي وترصد الدرجات بالكمبيوتر على طول وهنا رابط فيديو لطريقة التصحيح
الألي

وهنا تجربة مدرسة للتصحيح الآلي

http://goo.gl/KodziU

وفيه تدقيق عموما حتى الغش بالأمتحان صعب غير المراقبه وحوسة التظليل والوقت
وهنا مقال عن التصحيح وطريقة رصد قياس

http://goo.gl/pPGpRx

*)باقي شيء بعد؟
-أيه أهم شيء نتوكل على الله وهالشيء مهم وأنا بذاتي ما أنكر فضله وكرمه عليه لولاه ما أجتزت الأمتحان
فالحمدلله حتى يرضى والحمدلله إذا رضى والحمدلله بعد الرضى والحمدلله على كل حال
-تحتاجين حبة بنادول أو كوب قهوه عقب الأمتحانات لأن المخ يتعب فعليا وراح تحسون بألم لأنه قاعد يفكر لساعتين :(

تقريبا هاذي هي الأسئلة اللي دايم تكرر عن قياس ،،
الجزء الثاني بيكون كله روابط للمهارات اللي تحتاجون مذاكرته العددي اللغوي والتربوي ،،التخصص ماجمعت أو بحث إلا لتخصص العربي والتربية الأسلامية وتاريخ وجغرافيا إذا عندكم أسئلة أسئلوا هنا

http://ask.fm/MANAL_GH